DILI, 05 setembru 2024 (TATOLI)-Minitériu Edukasaun (ME) liuhusi Sekretáriu Estadu Sekundáriu Jerál no Ensinu Sekundáriu Tékniku Vokasionál (SEESJ-EST), Domingos Lopes Lemos, kinta ne’e, distribui ekipamentu muzikál hanesan “drumband” ba Eskola Sekundáriu Jerál (ESJ) 12 Novembru iha Becora, Postu Administrasaun Cristo-Rei, munisipiu Dili atu fasilita estudante sira hodi hasa’e abilidade liuliu talentu.
“Governu fó apoia ekipamentu musikal ne’e ba eskola hodi estudante utuliza no aprende. Mekanizmu atu aprende drumband depende husi profesór sira, mak tenke kria formasaun ba estudanre. Loos duni katak daudaun ne’e ita-nia eskola públika barak mak seidauk iha. Maibé, situasaun ida-ne’e ita presiza halo kolokasaun ekipamentu ba eskola sira hotu. Tanba ne’e ami lori ekipamentu sira mai iha eskola ida-ne’e”, hateten Sekretáriu Estadu ba Jornalista sira iha serimónia distribuisaun ekipamentu referidu ba ESJ 12 Novembru iha Becora, ohin.
Governante ne’e fó hanoin ba estudante tenke tau aas sentidu pertense hodi uza ekipamentu musikal hiran ne’e ho kuidadu tanba eskola barak fó apoia tiha komputadór no drumband, maibé la kuidadu di’ak nune’e ekipamentu balun aat ona.
“Sasán sira-ne’e ami fó ona ba imi no imi mak tenke kuidadu hanesan imi-nian rasik”, Governante ne’e realsa
Iha fatin hanesan, Diretór ESJ 12 Novembru iha Becora, Marcolino Menezes Babo, agradese ba ME ne’ebé apoia ekipamentu musikal ne’e.
“Apoia drumband ida-ne’e atu hasa’e kualidade eskola nian ita hamutuk hodi eleva kualidade edukasaun iha Timor Leste, liuliu hasa’e koñesementu labarik sira-nia liuhusi talentu. Ami fiar katak ho ekipamentu sira-ne’e ita bele hasa’e abilidade estudante sira-nian”, nia agradese.
Tuir dadús totál estudante ESJ 12 novembru Becora anuletivu 2024 hamutuk 1.419 ne’ebé kompostu husi klase 1 to’o klase 3.
Aleinde distribui ekipamentu drumband estudante ESJ 12 Novembru Bekora, aprezenta dansa kuturál ba SEESJ-EST.
Jornalista : Vitorino Lopes da Costa
Editór : Florencio Miranda Ximenes
Fontes Notísia : https://tatoli.tl/2024/09/05/me-distribui-ekipamentu-muzikal-ba-estudante-esj-12-novembru-iha-becora/
Leave a Reply