DILI, 27 jullu 2022 (TATOLI)–Eskola Ensinu Sekundáriu Jerál (ESJ) 12 novembru Becora daudaun ne’e falta Diretór no Gabinete Apoiu Tékniku (GAT) tanba pesoál ne’ebé asume kargu ne’e hetan nomeasaun ba kargu foun iha Servisu Edukasaun munisípiu Dili.
“Ami-nia eskola daudaun falta Diretór no GAT tanba sira na’in-rua hetan fali nomeasaun ba pozisaun foun iha Servisu Edukasaun munisípiu Dili. Ami-nia Diretór sai fali inspetór eskola no GAT sai fali Xefe Departamentu Finansa iha munisípiu Dili,” Adjuntu Diretór, Kanisius Elu informa ba Agência Tatoli, iha Eskola ESJ Becora, kuarta ne’e.
Daudaun iha Eskola ESJ 12 novembru Becora hela de’it Adjuntu Diretór maka kontinua hala’o hela serbisu hamutuk ho profesór sira hodi kontinua tau-matan ba prosesu ensinu aprendizajen ba estudante sira.
“Ha’u dehan ona ba kolega profesór sira katak maski ita falta líder na’in-rua, maibé ita mós labele depende liu ba sira na’in-rua, ida-ne’e nu’udar esperiénsia ba ita. serbisu ne’ebé ita bele halo tenke kontinua ba nafatin hodi hein hetan nomeasaun foun. Ita la preokupa sé mak atu mai troka, naran katak timor-oan no iha karater atu serbisu hamutuk hodi bele kontinua lori eskola ne’e ba oin hanesan eis líder na’in-rua halo ona ba eskola ne’e,” nia akresenta.
Aleinde ne’e, kestaun ne’e hato’o ona ba Diretór Servisu Edukasaun munisípiu Dili, maibé resposta ne’ebé simu maka tempu besik sei nomea filafali ema foun atu reforsa filafali atividade iha eskola.
Eis Diretór Eskola 12 novembru, Carlito da Costa, hetan nomeasaun ba kargu foun nu’udar Inspetór Eskola iha munisípiu Dili ne’ebé sei tau-matan ba eskola sira iha postu administrativu Cristu Rei área Becora nian.
Iha sorin seluk, Diretór Jerál Edukasaun Ensinu Ministériu Edukasaun Juventude no Desportu (MEJD), Luís Fernandes, hakfodak tanba foin simu informasaun katak Eskola 12 novembru krize líder no iha biban ne’e husu ba Adjuntu Eskola ne’e atu aprezenta pedidu mai ministériu hodi bele trata asuntu ne’e.
“Pedidu ne’e tenke informa detallu ho razaun forte katak líder na’in-rua ne’e hetan nomeasaun ba fatin foun tanba nesesidade diresaun ida nian atubele hetan prosesu lalais. Adjuntu ne’e tenke halo pedidu mai ita bele haree. Labele hasoru tiha situasaun hanesan ne’e mak nonook de’it iha fatin oinsá mak ita bele hatene,” nia tenik.
Jornalista : Tomé Amado
Editora : Julia Chatarina
Fontes Notísia : https://tatoli.tl/2022/07/27/eskola-esj-12-novembru-falta-diret-no-gat/
Leave a Reply