Dili, 1/09/2025, Eskola Secundaria Geral 12 de Novembro simu visita husi Vice Primeiro Ministru e Ministru Kordinador Asuntu Sosial Sr. Mariano Assanami Sabino. Diálogo ida ne’e iha pilar haat ne’ebe importante mak hanesan: konstrusaun Pas, konstrusaun Estadu, konstrusaun nasaun no konstrusaun karakter.
Diretor da Eskola Secundaria Geral 12 de Novembro, Marculino Menezes Babo, iha biban ne’e hatete katak “Basa ita hatene katak edukasaun mak sabe ba progresu nasaun nian, tamba ne’e Eskola 12 de Novembro iha komitmentu bo’ot tebes ba inovasaun, kuda metin valores ne’ebe ita nia gerasaun sira antes husik hela, hodi prepara estudante sira sai lideransa ne’ebe ho karater justu no honestu ba desemvolve Timor-Leste tuir misaun desemvolvimentu nian.
Director ne’e mos hatutan katak: “Eskola ne’e uluk iha okupasaun Indonesia naran SMA 1 BECORA, ne’ebe naran konhesido iha momentu ne’eba depois de ita independensia muda ba naran ESG 12 de Novembro. Atu dehan deit katak naran mak muda, fatin la muda, edifisiu ou infrastrutura la muda. Signifika katak fatin ne’e sai kedas ona mahon no proteze ona juventude lubuk ida ne’ebe eskola iha momentu ne’eba, bele mos dehan katak fatin ida ne’e husi uluk kedas metin ho joven ou estudante sira.
“Dados hatudu katak fatin hahoris lideransa atual barak, Ministro, Secretario Estado, Assesor, Offisial Militar no Polisia. Lider resistensia hahoris mos juventude lubuk ida ne’ebe hamutuk ho maluk timor oan seluk ne’e pertensia iha eskola SMA 1 halo asaun pasifiku ida hodi akontese Masakre Santa Cruz 12 de Novembro ho nune’e Eskola ne’e hanaran Eskola 12 de Novembro, director hatutan.
Iha biban ne’e mos director da eskola hatutan katak; atual estudante hamutuk 1248, ho kuantidade estudante ne’e eskola iha difikuldade bo’ot iha fasilidade eskola nian hanesan haris fatin no be’e.
Nune’e ida ne’e mak sai preukupasaun ba eskola 12 de Novembro.
Journalista: Zulmira Morais Fernandes
Editor: Zulmira Morais Fernandes
Leave a Reply