DILI, 15 fevereiru 2022 (TATOLI)–Eskola Ensinu Sekundáriu Jerál (ESJ) 12 Novembru Becora hahú ona konstrusaun edifísiu foun rua ho sala aula neen, liuhosi programa projetu komunitáriu, hosi Diresaun Nasionál Dezenvolvimentu Parque Eskolár (DNDPE), Ministériu Edukasaun Juventude no Desportu (MEJD).
“Projetu ne’e prevee ona orsamentu ho montante $132.000 resin. Konstrusaun ne’e sei la prejudika atividade ensinu aprendizajen estudante sira iha eskola, tanba projetu ne’e realiza iha rai eskola ne’ebé mamuk,” Diretór Eskola ESJ 12 Novembru Becora, Aniceto Pedro da Costa, informa ba Agência TATOLI, iha resintu eskola, tersa ne’e.
Enkuantu, konstrusaun edifísiu foun ne’e ho durasaun fulan-neen, ne’ebé toma konta hosi komunidade lokál.
“Kustu projetu sei foti tuir faze ne’ebé termina ona hosi Governu, ne’ebé iha faze haat, hahú ho 25% to’o ramata, ne’ebé tenke kumpre bainhira atu uza osan hodi finaliza konstrusaun edifísiu. Maibé faze ikus tuir planu foti de’it 15%, enkuantu 10% tuir desizaun sei labele foti,” nia esplika.
Enkuantu, kustu jerál ba projetu komunitáriu eskola 16 ho sala aula 64 iha munisípiu Dili ne’e prevee ona ho montante orsamentu $1.680,680,12, maibé klasifikasaun ba kada eskola sira mak la mensiona iha relatóriu DNDPE.
Jornalista : Tomé Amado
Editora : Julia Chatarina
Fontes Notísia : https://tatoli.tl/2022/02/15/eskola-esj-12-novembru-becora-hahu-konstrusaun-sala-aula-neen/
Leave a Reply